सुनसरी, बैशाख २९ गते ।
सुनसरीको धरान–१३ क्षेत्रमा प्रहरीले एम्बुलेन्स प्रयोग गरी गाँजा ओसारपसार भइरहेको अवस्थामा ठूलो परिमाणको लागूऔषध बरामद गरेको छ। नियमित सुरक्षा जाँचका क्रममा पक्राउ परेको एम्बुलेन्सबाट ४ सय ४० किलो गाँजा फेला परेको प्रहरीले जनाएको छ ।

बरामद गरिएको गाँजा प्लास्टिकका बोरामा प्याक गरेर राखिएको अवस्थामा भेटिएको थियो। प्रहरीले सवारी साधन नियन्त्रणमा लिए पनि चालक भने फरार रहेको र उनको खोजी भइरहेको जनाएको छ ।

अनुसन्धानका क्रममा उक्त एम्बुलेन्स धरानस्थित एक निजी स्वास्थ्य संस्थासँग सम्बन्धित रहेको खुलेको छ। प्रहरीले लागूऔषध तस्करीविरुद्ध निगरानी अझ कडा बनाउँदै घटनामा संलग्न सबै व्यक्तिलाई कानुनी दायरामा ल्याइने जनाएको छ।